ربنا ما يقطعلكوا عادة
المصريين اهما .....حيوية و عزم و همة
ليك شوق فى حاجة ..... مع الاعتذار الشديد للكاتب الجميل محمد فتحى
القرد فى عين امه ........سبحن الله قرد برضه
اهم 8 مظاهر - كان نفسى يقفلوا عشرة - فى استقبال شباب النت لشهر رمضان
طبعا و زى كل سنة بيهل علينا رمضان بمظاهره و روحانياته و فوانيسه و فطاره و سحوره و تراويحه و ختماته بس اللى زاد عن كل سنة - على الاقل بالنسبة لى - انه و بعد ان اصيحت من مرتادى الانترنت الدائمين و خصوصا الفيس بوك وجدت مظاهر تانية خالص منتشرة بشدة بينا - الجمع ده يضم جيل الانتر نت و بتوع التاتو و بتكلم على نفسى قبل اى حد . و يمكن تكون دى اهم 10 مظاهر لاستقبال شباب الفيس بوك لشهر رمضان - قبل رمضان باسبوع هتلاقى معظم الناس غيرت صورة البروفايل بتاعها لصورة غالبا مش هتخرج عن رمضان كريم او اللهم بلغتا رمضان و فى رمضان نفسه بأة صورة اللهم بلغنتا رمضان هتتشال و بيتحط مكانها رمضان مبارك - حمى الاشتراك فى الجروبات الدينية او اى جروب بيحمل بين طيات اسمه كلمة رمضان حتى لو كان اسم الجروب اصلا رمضان مبروك ابو العلمين حمودة - لابد طبعا من تهنئة الاصدقاء الفيسبوكيين بقدوم الشهر الفضيل فهتلاقى الكل بعت رسالة لكل ال friends اللى عنده و بيقولهم فيها كل سنة و انتم طيبين و كده و الاسهل من انه يبعت الرسالة دى انه يكتب فى ال status بتاعته برضه كل سنة و انتم طيبين يا اصحابى يا اهلى يا جيرانى - قبل رمضان بيومين كده بنبدأ نتابع التليفزيون عشان نعرف مواعيد برامج الدعاة الشباب بتتذاع امتى و اهمهم طبعا البرنامج السنوى بتاع عمرو خالد و انضم ليه بعدها مصطفى حسنى و معز مسعود و مؤخرا انضم ليهم مجموعة جديدة ما اعرفش اساميهم لانى بطلت اتابع الحقيقة لانهم بدأوا يكتروا اوووووووى - متابعة التليفزيون بررررررضه بس عشان نعرف هنشن على انهى تسع مسلسلات هنتفرج عليهم السنة دى عشان اكيد مش هنلحق نتفرج على السبعين مسلسل اللى بيتذاعوا كل يوم - طبعا اولاد الناس الذوات اللى ربنا فاتح عليهم من وسع - احنا مش بنحسد على فكرة - و موبايلاتهم خط و مش كارت بيختاروا كام رسالة من نوعية ازيك يا مسطول او ما تتسحرش فول و نام بعد الفطار على طول و فى اخر الرسالة هتلاقي رمضن كريم , يبعتوها للاهل بأة عشان يهنوهم برمضان اما الغلابة امثالنا من اصحاب الكارت بيشحنوا عالهوا و بيدوا لاصحابهم رنه عشان يعرفوا انهم بيهنوهم برمضان ده طبعا لان المكالمات الارضية اصبحت غبر واردة نوهااااااااااااااائى ما حنا جيل الانترنت و ما عندناش وقت نرغى - بعض الناس بتغير خلفية الموبايل عشان تناسب برضه الشهر الكريم و غالبا الخلفية بتكون شبه بتاعت الفيس بوك - تغيرر نغمات الموبايلات عشان تناسب الجو الروحانى العام اللى الناس عايشة فيه فهتلاقى النغمات لا تخرج عن ادعية مشارى راشد او محمد جبريل - ده بالنسبة للناس الاكبر سنا شوية - او ممكن تلاقى اغانى رمضان اتحطت كنغمات للموبايلات يمكن دى اهم الملاحظات اللى شفتها السنة دى و قفشت نفسى بعملها برضه - عادى يعنى ما انا من شباب الجيل المتطور -كان نفسى اقفلكم المظاهر دى عشرة بس يللا كفاية عليكم كده و كل سنة و انتم طيبين
حدث فى مثل هذا اليوم .......الكيس بجنيه .....الجزء التانى و الاخير
حدث فى مثل هذا اليوم ...... الكيس بجنيه
بس احنا نحلم :)))
رمضاااااااااان جااااااااااااااااانا و فرحنا به بعد غيابه......اهلا رمضان
رمضان جاااااااااااانا
و فرحنااااااااااااااااااابه
بعد غياااااااااااااااابه
و بقاله زمااااااااااااان
ياااااااااااااااااااااااه
فاتت سنة كاملة على رمضان اللى فات بايامه بلياليه الجميلة
و خلاص كلها كام يوم و نستقبل الشهر الجميل الكريم الاصيل
شهر رمضان
كلها كام يوم و نقعد كلنا بعد صلاة العشاء ادام التليفزيون فاتحين القناة الاولى مستنيين الانتقال الى اذاعة خارجية من دار الافتاء - تقريبا حسب اما افتكر يعنى عموما هو مكان بيطلع فيه شيخ الازهر اللى ما بحبش اشوفه غير فى اليوم ده
و يقول تعلن مش عارفة هيئة ايه و ايه عن ان اليوم هو المتمم لشهر شعبان و ان غدا هو اول ايام شهر رمضان الكريم اعاده الله علينا بالخير و اليمن و البركات
و الحقيقة انا لما باجى اتكلم على رمضان مش ببأة عارفة ابدأ منين؟؟؟؟
ابدأ بذكرياته معانا من الطفولة من ايام بوجى و طمطم و سلاحف النينجا
و اللا اتكلم على ذكراته معانا لما كبرنا شوية و عرفنا ان رمضان ده مش رمضان سلاحف النينجا و ان رمضان جاى يشحننا ايمانيا عشان نعرف نكمل طوووووول السنة و الشاطر هو اللى يكمل شحن البطارية لاااااااااخر الشهر
و ما يفصلش الشحن قبل اما البطارية بتتملى - كالعادة بنيجى فى النص و نهنج و شوية و نشد و نيجى عالاخر و فسسسسسسسسس خالص.
مش عارفة ابدأ منين و اقول ايه و اللا ايه
بس النهاردة عاوزة اشوف معاكم كده ازاى كل واحد بيحس برمضان و قرب حلوله حتى قبل اما يبدأ؟
طب ايه رأيكم ننزل نتمشى سوا كده فى حى من احياء القاهرة و نشوف الناس استعدت ازاى
يللا بينا...........
لو مشينا فى اى شارع دلوقتى مش هنشوف محل سواء كبير او دكان صغير الا و معلق على بابه فانوس كبير و مش هتلاقى شارع الا و تلاقى فيه واحد اتفتح له محل فجأة كده و مرصوص فيه فوانيس رمضان اشكاااااااااال و الواااااااااان -ملحوظة المحل ده طول السنة مقفول فى الغالب و ساعات بيكون مكتبة او محل عصير او بقالة و بيغير نشاطه موسميا فى شعبان لغاية اما رمضان يفنش
ملحوظة تانية : الفوانيس يا جماعة دلوقتى عشان تبقوا واخدين بالكم معانا بقيت اشبه باللعب العادية على شكل المفتش كرومبو او المحقق كونان اى هبل يعنى بس اهم حاجة انها بتغنى اهلا رمضان
نيجى عالفطاطرية و افران العبش
هتلاقى كل فرن عيش نصب صوان جميل ادامه و جهز عدة الكنافة و القطايف من نص شعبان تقريبا لغاية نهاية رمضان
طبعا مش هنتكلم عالعطارين
ده الموسم بتاعهم بأة
كل انواع البخور بتطلع غير طبعا اليااااااااااامييييييييييييش - اللى ما حدش بيهوب ناحيته غير اخواننا ربنا يكرمهم يا رب الاغنياء الوحشين دول- بس عموما لازم رمضان ييجى و كل بيت على الاقل خالص فيه نص كيلو فول سودانى حتى على شوية زبيب على شوية جوز هند لزوم حشو القطايف و الكنافة
كل المحلات الكبيرة دلوقتى هتلاقيها منزلة عروض ناااااااار بأة - طبعا كل الاسر المصرية بتفقد صوابها "عشان انا مؤدبة بقول تفقد صوابها بس هى ليها معنى تانى" اول اما بتسمع كلمة عروض
يعنى علبة سمنة عليها زتونة هدية - واااااااااااااااااااااو عرض يهبل لازم نجيب علبتين على الاقل امال هنتسحر ازاى يعنى من غيلا الزتون
لترين زيت بسعر لتر و تلات اربع
و عروض بالعبييييييييييط بيكسب منها التجار الكبار على قفا الشعب العبيييييييييط
بس الناس بتفرح لما بتحس انها جابت شىء و شويات على دخول رمضان - اى حاجة جديدة بتدخل البيت بتفرح القلب فعلا حتى لو علبتين زبادى عالسحور - و المصحف احنا شعب غلبان
نكمل فرجة فى الشوارع
محلات الفول و الطعمية بتنتعش و بتفرش ادام المحل قسم خاص للمخلل بانواعه اللى ما فيش تقريبا حد فى مصر بيفطر و هو مش على الترابيزة
كل القهاوى - تقريبا - و محلات الكشرى مغلقة للتوضيبات
و محلات تانية جهزت كام ترابيزة و كام كرسى ادام المحل و عملت مائدة رحمن - مصر و الله لسه فيها خير كتير
المهندسين و المناطق الفخيمة النضيفة هتلاقى موائد الرحمن اتنصبت برضه بس على اوووسع
و انواع الاكل اللى هنا هتلاقيها مختلفة عن اللى ادام المحلات اللى فى عابدين او الجيزة او بولاق او امبابة
لو تعرفوا كلكم هتسيبوا بيوتكم و تنزلوا على موائد الرحمن دى و عموما من زمان بنسمع اوشاعات ان الموائد الفخيمة دى مصروف عليها
من واحدة بركة من اهل الفن ربنا يديها الصحة
هتلاقى التليفزيون من قبل رمضان بشهر بيعلن عن مسلسلات رمضان - التليفزيون خلاص اقنع الناس ان رمضان ده هو موسم عرض المسلسلات الجديدة و ما لهوش اى لازمة غير كده و ناس كتير بقيت بتستناه بس فعلا عشان كده
هتسمع كتير اغنية رمضان جانا و وحوى يا وحوى اللى ما بحسش ان رمضان قرب الا لما بسمعهم
بلاقى كل واحد ماشى فى الشارع بسبحة فى ايده و ما بيقولش عليها حاجة :)
بلاقى كل واحدة و واحد راكب او راكبة المترو او الاتوبيس او اى وسيلة مواصلات و ماسكين مصحف - غالبا برضه و لخيبتنا الشديدة ما بيتفتحش غير وقتها بس
بتلاقى المساجد زحممممممممة - و خصوصا فى اول رمضان و بتقل تدريجيا لغاية ليلة 27 رمضان المرجح انها ليلة القدر لتنتعش مرة اخرى ثم تعود المساجد الى فارغها الازلى حتى رمضان الذى يليه
و اخيرا و ليس اخرا فعلا
بنشم لرمضان ريحة مميزة فى الجو - بجد و الله فعلا - ريحة اول ما بنلاقيها منتشرة فى الجو بنتأكد خلاص ان رمضان قرب
يللا بأة كل سنة و انتم طبيييييييييين
و رمضان كرييييييييييييم
نفسى :)
- نفسى امسك نفسى فى لحظة صفا و قرب من ربنا و اكلمه و اناجيه زى زمان
- نفسى امشى فى كل شارع و حارة و زقاق فيكى يا قاهرة
- نفسى اخد حتة من كل جامع و بيت مهكع و شباك مخلع و حتة خشب فى مشربية و اشيلها جوة نفسى عشان ما انساش احنا مين و اصلنا ايه
- نفسى اصور كل الحاجات دى
- نفسى اوريكم كل ده و تحبوه
- نفسى اقعد على قهوة فى الحسين- ايوة قهوة ايه بس ممكن يعنى لو ما قعدتش اتفرج عليها من بعيد............
- نفسى اشوف الناس القريبين منى قوى جنبى على طول ; الحقيقة انا كان نفسى انهم يكونوا اخواتى مش مجرد اصدقاء او اقارب و الناس دى اثبتت انه رب اخ لك لم تلده امك
- نفسى اقول كل اللى انا عاوزاه و ما اخافش من حد
- نفسى اشوف بلدنا احسن
- نفسى اخواتى الصغيرين يتعلموا تعليم نضيف
- نفسى بعد اما يتخرجوا يلاقوا شغلانة كويسة تاخدهم و تاخد احلامهم و تطير بيها فى السما
- نفسى اكون سبب فى ابتسامة راجل او ست عجوزة او ضحكة طفل بيلعب فى الشارع- اشمعنى بيلعب فى الشارع - غالبا عقدة من الطفولة
- نفسى اشوف زينة رمضان عندنا فى الشارع- شارعنا نضيف و السكان ما بيحبوش يبوظوا منظره - و الاقى العيال بيلعبوا بالفوانيس فى الشارع و العب معاهم -عمرى ما عملتها.
- نفسى اصرخ بصوت عاااااااااااااااااالى فى حتة هووووووووو
- نفسى امسك طيارة ورق و اجرى فى حتة واسعة و اطيرها
- نفسى اروح فى مكان اخضر فى اخضر - خير اللهم اجعله خير - و استلقى - حلوة استلقى دى - على ظهرى و ابص فى السما و اسررررررررح
- نفسى احضر حفلة لحمزة نمرة _ و دى حصلت الحمد لله .
- نفسى اقرأ كتب كتير لسه
- نفسى اقدر اطلع امى و ابويا عمرة ... و يدعولى
- نفسى ربنا يتقبل دعوتهم
- نفسى اعمل حاجة عدلة تتكتب لى عند ربنا قبل اما اموت
- نفسى اكون كويسة
- نفسى يكون معايا الة زمن و اعيش فى كل عصر شوية
- نفسى اعرف اعزف عالعود او القانون - بعرف العب عالاورج طشاش :)
- نفسى اخد كرسى و اقعد فى قلب شارع المعز و ارسم كل مئذنة و قبة و بيت فيه
- نفسى اعرف ارسم اصلا :)
- نفسى اكون سبب فى تغيررحياة الناس حولى للافضل
- نفسى بجد اعمل حاجة اساعد بيها فى توظيف الشباب - و دى بجد اوى اوى
- نفسى اجرررررى - بقالى ياما ما جريتش
- نفسى انام اوى :(
- نفسى اروح بلدين الهند و اسكتلندا و ارجع مصر طوالى - ما بحبش السفر و لو انى بحب التغيير و بزهق بسرعة
- الحقيقة ى مش نفسى بس كتييييير بتخيل نفسى انى فى نهاية حياتى هتدروش و همشى سواح فى شوارع الازهر و طرقات خان الخليلى و غالبا الاحساس ده بيجيلى لما بحس ان عقلى مش هيستحمل الواقع اللى عايشينه و لازم فى يوم يطييييييير
- ده ما يمنعش انى فعلا نفسى امشى فى الاماكن دى لوحدى و اسرح بأة و اتخيل كيف كانت فى الماضى الغابر من غير ما بياع يندهلى و لا حد يستغرب البنت الماشية لوحدها بتتفرج فى ازبهلال على المبانى فقط
- نفسى فى يوم من الايام اكون مصورة او صحفيةاو الاتنين :)))
- نفسى اشتغل فى الاذاعة
- كان زمااااااااااان - ايام ما الواحد كان عنده نظر - نفسى اخد جايزة نوبل زى احمد زويل بس طبعا جتنا نيلة فى حظنا الهباب
- نفسى احج او على الاقل اطلع عمرة
- نفسى انزل اتمشى الفجر لوحدددددددى
- اخيرا و ان يكن انه ليس اخرا.......نفسى......و اللا انتوا ما لكوش دعوة بتفسى الاخرانية دى .........كفاية كده عليكوا ده انتوا رغايين اوى
حمزة نمرة و بس
قالولى بتحب مصر ... قلت مش عارف - تميم البرغوثى