احلام فى غاية البساطة و التواضع بس مش عارفة حتى هذه اللحظة احققها يمكن لانها غير قابلة للتحقيق للظروف الاجتماعية او الاقتصادية او لكسلى انا الشديد بس فى كل الاحوال دى مجموعة مختارة من اللى نفسى فيه
يللا انطلق
- نفسى امسك نفسى فى لحظة صفا و قرب من ربنا و اكلمه و اناجيه زى زمان
- نفسى امشى فى كل شارع و حارة و زقاق فيكى يا قاهرة
- نفسى اخد حتة من كل جامع و بيت مهكع و شباك مخلع و حتة خشب فى مشربية و اشيلها جوة نفسى عشان ما انساش احنا مين و اصلنا ايه
- نفسى اصور كل الحاجات دى
- نفسى اوريكم كل ده و تحبوه
- نفسى اقعد على قهوة فى الحسين- ايوة قهوة ايه بس ممكن يعنى لو ما قعدتش اتفرج عليها من بعيد............
- نفسى اشوف الناس القريبين منى قوى جنبى على طول ; الحقيقة انا كان نفسى انهم يكونوا اخواتى مش مجرد اصدقاء او اقارب و الناس دى اثبتت انه رب اخ لك لم تلده امك
- نفسى اقول كل اللى انا عاوزاه و ما اخافش من حد
- نفسى اشوف بلدنا احسن
- نفسى اخواتى الصغيرين يتعلموا تعليم نضيف
- نفسى بعد اما يتخرجوا يلاقوا شغلانة كويسة تاخدهم و تاخد احلامهم و تطير بيها فى السما
- نفسى اكون سبب فى ابتسامة راجل او ست عجوزة او ضحكة طفل بيلعب فى الشارع- اشمعنى بيلعب فى الشارع - غالبا عقدة من الطفولة
- نفسى اشوف زينة رمضان عندنا فى الشارع- شارعنا نضيف و السكان ما بيحبوش يبوظوا منظره - و الاقى العيال بيلعبوا بالفوانيس فى الشارع و العب معاهم -عمرى ما عملتها.
- نفسى اصرخ بصوت عاااااااااااااااااالى فى حتة هووووووووو
- نفسى امسك طيارة ورق و اجرى فى حتة واسعة و اطيرها
- نفسى اروح فى مكان اخضر فى اخضر - خير اللهم اجعله خير - و استلقى - حلوة استلقى دى - على ظهرى و ابص فى السما و اسررررررررح
- نفسى احضر حفلة لحمزة نمرة _ و دى حصلت الحمد لله .
- نفسى اقرأ كتب كتير لسه
- نفسى اقدر اطلع امى و ابويا عمرة ... و يدعولى
- نفسى ربنا يتقبل دعوتهم
- نفسى اعمل حاجة عدلة تتكتب لى عند ربنا قبل اما اموت
- نفسى اكون كويسة
- نفسى يكون معايا الة زمن و اعيش فى كل عصر شوية
- نفسى اعرف اعزف عالعود او القانون - بعرف العب عالاورج طشاش :)
- نفسى اخد كرسى و اقعد فى قلب شارع المعز و ارسم كل مئذنة و قبة و بيت فيه
- نفسى اعرف ارسم اصلا :)
- نفسى اكون سبب فى تغيررحياة الناس حولى للافضل
- نفسى بجد اعمل حاجة اساعد بيها فى توظيف الشباب - و دى بجد اوى اوى
- نفسى اجرررررى - بقالى ياما ما جريتش
- نفسى انام اوى :(
- نفسى اروح بلدين الهند و اسكتلندا و ارجع مصر طوالى - ما بحبش السفر و لو انى بحب التغيير و بزهق بسرعة
- الحقيقة ى مش نفسى بس كتييييير بتخيل نفسى انى فى نهاية حياتى هتدروش و همشى سواح فى شوارع الازهر و طرقات خان الخليلى و غالبا الاحساس ده بيجيلى لما بحس ان عقلى مش هيستحمل الواقع اللى عايشينه و لازم فى يوم يطييييييير
- ده ما يمنعش انى فعلا نفسى امشى فى الاماكن دى لوحدى و اسرح بأة و اتخيل كيف كانت فى الماضى الغابر من غير ما بياع يندهلى و لا حد يستغرب البنت الماشية لوحدها بتتفرج فى ازبهلال على المبانى فقط
- نفسى فى يوم من الايام اكون مصورة او صحفيةاو الاتنين :)))
- نفسى اشتغل فى الاذاعة
- كان زمااااااااااان - ايام ما الواحد كان عنده نظر - نفسى اخد جايزة نوبل زى احمد زويل بس طبعا جتنا نيلة فى حظنا الهباب
- نفسى احج او على الاقل اطلع عمرة
- نفسى انزل اتمشى الفجر لوحدددددددى
- اخيرا و ان يكن انه ليس اخرا.......نفسى......و اللا انتوا ما لكوش دعوة بتفسى الاخرانية دى .........كفاية كده عليكوا ده انتوا رغايين اوى
Posts
0 رغيكم يهمنا:
Post a Comment