دور بنفسك جوة نفسك

متحاولش تبقى اى حد تانى غير نفسك
دور بنفسك جوا نفسك
متكسلش وقوم قلب ودور هتلاقى ميزتك
صدقنى هتلاقى ميزتك
دور بنفسك جوة نفسك

متحاولش تبأة حد تانى غير نفسك
خليك واثق فى نفسك
قوم دور بنفسك جوة نفسك
هتلاقى حاجة ما حدش فيها ينافسك

ميزتك فى صوتك او فى رسمك
متستبعدش تبقى ميزتك حركة بتعملها جسمك
او فكرة fantastic فى مخك
ممكن تكون كمان مميز فى الطب والحساب
او ميزتك نفسك فى طبخك
ممكن ميزاتك تطلع فى لوحة او كتاب
ممكن تكون ميزتك لياقتك
ميزتك انك قلب ميت تقدر تضرب كل الناس
او تكون ميزتك سياستك
ميزتك انك رومانسى ومأفور فى الاحساس
او تكون ميزتك فراستك
ممكن ميزتك تكون قلب ابيض او حنون
ممكن تكون ميزتك حماشتك

فى ناس تعرف تفصل لبس الناس بكل احساس
مهما كانت خامة قماشتك
وناس بضربة فاس تحول تربة قلقاس (او اناناس)
بفضل ربى مش بفضلك
ولو فى يوم لبست قضية فى ناس ميزتها هى
(هى ايه )
ميزتها انها تجيب برأتك
بس ركز فى اللى جى

محدش عجبه حاله حالة غيره اللى بتحلاله...... دايما
شرقى بيغرب وايسر نفسه يبقى ...... ايمن
التخين بيخسس والتانى رفيع نفسه...... يتخن
اسمر بيفتح ابيض نفسه يبقى بلاك ......... فحمة
من خلفله بنت بيزعل نفسه يخلف واد


ايون ايون ايون

انسى انك ترضى بحالك دايما عاجبك حال الغير
مهما تكون حالتك دايما باصص للتغير
صدقنى لو بصيت جواك هتلاقى ياما كتير
قدرات مميزات ان كنت غنى او فقير
متقللش من نفسك ده انت لنفسك طاقة غير
هتحقق اللى فى نفسك واللى يمسك خليه يطير
ارضى ياابن ادم باللى اتقسم عليك
ولاونى عارفك مش هترضى غير بتراب فى عنيك

ربك ميز كل واحد منا بحاجة
فالناس فعلا لبعض دايما محتاجة
دور والقى ميزتك حاول حافظ عليها
طورها اتميز بيها حياتك هتلاقيها


فى الاول ماشية صح طول ما انت راضى بيها
ارضى بحياتك انت واقبلها باللى فيها
ده الرضى نعمة كبيرة احمد ربك عليها
وخدها منى كلمة مافى حاجة بتساويها

حد يترجملى بيقول ايه الواد ده

اني اقولك عيقول متحاولش تبقى حد تانى
غير نفسك
خليك واثق فى نفسك

قوم دور بنفسك جوا نفسك
هتلاقى حاجة محدش فيها ينافسك

لو ملكش عازة مكنتش اتخلقت
ولا اتحسدت من الناس ولا اترزقت

هل البنى ادم "فى مصر" مسير ام مخير؟؟

سؤال محيرنى بقاله فترة وعمال يزن فى دماغى يزن يزن زى الدبور اللى عمال يزن على الدمار الشامل لعشه

سؤال خلى كرامتى و العرق التركى اللى سمعت انه فى عيلتنا - و مع ذلك ما ظهرش غير عند اصغر اخواتى ينقح عليا و اقول ابدا انا بعمل كل حاجة بمزاجى و ما حدش يقدر يفرض عليا حاجة.
هع ههع ههع- ضحكات ساذجة متصلة.
السؤال هو :هلى المواطن المصرى مسير ام مخير ؟؟؟؟؟؟
بعيدا عن الناحية الدينية خالص يا جماعة
طب ما تيجوا نتفرج على حياة مواطن مطحون - اقصد مصرى من البدايات المبكرة يمكن اقدر افهمكم قصدى.
الاسم :المواطن المطحون "ميدو"
محل الاقامة : منزل اسرة متوسطة "يعنى دخلها ما يزيدش على 700 فى الشهر و مقضياها جمعيات و شقلباظات"
الوظيفة : بسم الله ما شاء الله داخل كى جى 1
السن 5 سنوات و احيانا 6 حسب المدرسة

المشهد الاول :

فى منزل الاسرة السعيد و فى حوار هادىء بين الاب و الام
ام ميدو:الواد ميدو لازم يدخل مدرسة خاصة ادينى بقولك اهو, و اللا عاوز الواد كيمو ابن خالته يطلع احسن منه!!
ابو ميدو: وهنجيب مصاريف المدرسة منين ما انتى عارفة ان مصاريفها شوووووك
ام ميدو : ما ليش دعوة هعمل جمعية و اقبضها الاول اهم حاجة الواد كيمو ما يبقاش احسن من ميدو حبيبى
ميدو - و البراء فى عينيه: ماما مث عاوذ الوح المدلثة خالث خالث
ام ميدو : بس يا واد مش كفاية هيتقطم وسطنا فى الجمعية عشان ندخلك احسن مدارس
ميدو فى عقله الباطن طب و انا مالى انا مث هلوح المدلثة دى انا عاوذ اقعد اتفلج على ثبيث تووون عاااااااااااااااااا

المشهد التانى :

اول يوم مدرسة لميدو , الحضانة مليانة على اخرها عيال صغيرة عمالين يعيطوا و هو مكلبش فى ايد مامته من هول المنظر
ام ميدو: يللا بأة يا ميدو ادخل جوة مع الميس
ميدو: لا لا انا ما تمثيث و تثيبينى لوحدى
ام ميدو : ما انت يا حبيبى مش لوحدك ولا حاجة كل العيال موجودة اهو و بعدين ما تخافش الميس هتفضل معاك
ينظر ميدو للكائن المسمى "ميس" و هى تقترب و تستعد للانقضاض عليه و يتطاير من عينيها الشرر
عاااااااااااااااااااااااااااااااااااااااااااا مش رايح مش راااااااايح

المشهد الثالث :

كبر ميدوو وصل للابتدائية و بأة مستأنس خااااااالص و بيروح المدرسة عادى بلا ادنى اعتراض
ام ميدو: شد حيلك يا ميدو عاوزينك تجيب درجات عالية فى الابتدائية
ميدو : ماما انا عاوز اسألك سؤال, هو انتوا ليه عاوزنى اجيب درجات عاليه؟ هعمل بيها ايه يعنى
شهقت ام ميدو شهقة من المعاميق و ضربت على صدرها و قالت: يعنى ايه ليه لازم طبعا تتفوق و تجيب درجات عالية دى شهادة يابنى مش لعبة
ميدو : ايوة برضه ليييييييه؟
ام ميدو : هو كده عشان تبأة كويس فى البلد دى لازم تذاكر وتنجح و تجيب درجات عاليه و بعدين بقولك ايه انت عاوز الواد كيمو يبأة احسن منك قوم يا واد شوف مذاكرتك لحسن اصحيلك ابوك
طأطأ ميدو رأسه فى استسلام و رجع لمذاكرته و انتهى الامر


المشهد الرابع :

ميدو وصل للثانوية العامة و بيحاول يقرر يدخل علمى و اللا ادبى
ام ميدو: علمى طبعا,انت لازم تكون دكتور واللا مهندس لكن هتدخل ادبى تعمل ايه بطل خيابة يا واد
ابو ميدو فى اول ظهور له منذ فترة: بص يا ميدو يا حبيبى شوف انت بتحب ايه و ادخل اقرب مجال ليه
ميدو: يا بابا ما انت عارف انا طول عمرى بحب الكتابة و نفسى اطلع كاتب او صحفى ده حلم حياتى
ام ميدو: يا لهوى صحفى ايه و كتابة مين؟؟؟ انت عاوز تطلع شحات يا واد , هى كلمة ادخل علمى و اطلع دكتور و اللا مهندس و بعدها ابأة اكتب اللى انت عاوزه انشالله تكتب كتابك عالبت اخت كيمو, لكن ما فيش حاجة اسمها ادبى.......و اللا عاوز الواد كيمو يبأة احسن منك
ابو ميدو باتسامة منكسرة: خلاص يا ميدو ماما عندها حق .....معلش عشان ماما ما تزعلش منك
ميدو و هو برضه مطأطىء الرأس: خلاص يا بابا خلاص يا ماما اللى انتوا تشوفوه


المشهد الخامس:

نتايج الثانوية العامة طلعت و التليفزيون شغال و كل 10 دقايق بيذيع اغنية" و حياة قلبى و افراحه"
غالبا المسئولين فى التليفزيون بياخدوا اليوم ده اجازة و بيشغلوا شريط الاغنية و ياخدوا نص يوم و يروحوا
ام ميدو: الف مبروك يا ميدو جبت مجموع يدخلك هندسة زى ما طول عمرى بحلم....اخيرا همشى جنبك كده فى الشارع و اقول ابنى الباشمهندس ميدو اهو
ميدو بيفكر فى سره على الله بس ما يقولوش العبيط اهو اهو
ميدو : الحمد لله يا ماما بس انا عاوز اقولك بس انى بجد مش عاوز ادخل هندسة و لا نيلة انا ما بحبهاااااااااش انا عاوز ادخل اعلام قسم صحافة و الحمد لله انا جايب مجموع يدخلنى اعلام
ام ميدو تانى يا ميدو تانى يا بنى الكلام ده ما بيأكلش عيش حاف لكن مهندس هيبأة ليك شنة و رنة
ميدو : يا ماما ما هو المهندسين هما كمان مش لاقيين ياكلوا عيش حاف و متمرمطين هما كمان
ام ميدو: مش مهم المهم انك هتكون مهندس هو انت طايل يا كدا يا هصحيلك بابا
ميدو برضه مطأطىء الرأس بس خلاص دقنه قربت تلزق فى صدره
حاضر يا ماما اللى تشوفيه

المشهد السادس و الاخير:

ميدو بعد التخرج من كليه هندسة بسنة كاملة , قاعد فى البيت من غير شغل و لا يحزنون
ميدو :عاجبكم كده ادينى دخلت هندسة زى ما انتوا عاوزين
و ذاكرت و نجحت زى ما انتوا عاوزين
و ما رضيتش ادخل اعلام عشان ما تزعلوش
و ادى النتيجة قاعد جنبكم و مش لاقى شغل فى الهندسة و لا فى غيره
مش كنت دخلت اعلام على الاقل كنت هعمل حاجة بحبها؟
ام ميدو: خلاص يا ميدو كل شىء قسمة و نصيب و ابوك بيكلم عمك ابو كيمو عشان يشوفلك اى شغلانة معاه فى مكتب المحاسبة بتاعه
ميدو: طب و انا هعمل ايه فى مكتب المحاسبة و انا خريج هندسة
ام ميدو: اى حاجة يابنى هو انت طايل بدال قعدتك دى
ميدو : لا خلااااااااااااااص انا كده شبعت و اتهريت
انا هدور على الشغل بنفسى و اعمل اللى انا عاوزه ان شالله اشتغل صبى قهوجى بس كده كفاية خلاص فضلت اسمع الكلام لحد ما ودانى دلدلت
و من هنا و رايح مش هعمل غير اللى انا عاوزه فى الوقت اللى انا عاوزه

ام ميدو بتبص لابو ميدو باستغراب و بصوا فى الارض و هما كمان مطأطأين الرأس

عرفتوا بأة سؤالى معناه ايه ؟؟؟؟؟
هل المواطن او بمعنى ادق الشاب المصرى مسير ام مخيييييير؟

لا انتى بنتى...و لا اعرفك

"شوفى يا ايناس
انتى بنتى و حبيبتى و "كفاءة" بس لو عملتى كده ...لا انتى بنتى ولا اعرفك
ادينى بقولك اهو
و قد اعذر من زرزر"
................
دى كانت اول ردود افعال الوالدة لما رحتلها شايلالها خبر -تخيلت انه مش هيفرق معاها كتير
خبر افتتاح - ام نقول اعادة افتتاح - لمدونتى الغلبانة
كان اول رد فعل ليها هو سؤال وجيه و حيوى و مهم
"يعنى ايه مدونة؟؟"
قالتها و هى مشغولة فى الفرجة على مسلسل عائلة الحاج متولى للمرة التسعتاشر
كانت تقريبا مش بصالى
سكت كده شوية و بينى و بين نفسى عمالة ادور على تعريف سهل للمدونات بس فى الاخر لقيت نفسى عمالة اتهته بكلام غير مفهوم مصاحب بتشويحات عصبية بايدى "كأنى حاوى هيطلع ارنب من ودانه"
طلعت منى اخيرا كلمة مفهومة
"يا ماما البلوج ده زى صفحة على النت لكى ان تكتبى فيها ما تشائين وممكن بعد كده ناس تقراه و تبدأ تناقشك و تحاورك فى اللى انتى كاتباه
"اممممممم...و انتى هتكتبى ايه بأة؟؟؟"
سألتنى و هى لسه بتتفرج على الحاج متولى بمراتاته بشققه الفخمة - اللهم لا حسد - بعربياته بسلطاته ببابا غنوجه
"هكتب فى اى حاجة و كل حاجة , اى حاجة بتحصل حوالينا و مش بناخد بالنا منها, يمكن نقدر نغير الحاجات اللى مش عاجبانا و يبأة عملنا حاجة عليها القيمة فى الدنيا دى"
طبعا و انا بتكلم فى جدية شديدة و عاقدة حاجبي و بررررررضه بشوح بايدى و لا كأنى جمال عبد الناصر فى خطاب تأميم قناه السويس
و ماما العزيزة و لا هى هنا "بصى يا بت يا ايناس الستاير عاملة ازاى
تلاقيها متكلفة شىء و شويات"
جرررررر
ستاير ايه يا ماما و انا بكلمك فى ايه
بقولك مدونة و سياسة و اقتصاد تقوليلى ستاير
ايه ايه ايه ايه؟؟؟؟؟؟؟؟ سياسة مين يا بت؟؟؟
اوباااااااااا ماما سابت الحاج متولى و فاقتلى
"ايه يا ماما بس؟؟؟"
"سياسة ايه اللى عاوزة تكتبى فيها؟
بقولك اييييييه لمى الدووووور و بلاش جنان
انتى عاوزة تروحى فى داهية؟"
"ايه يا ماما هو انا قلتلك انى هرتكب جريمة؟
انا عاوزة اتكلم مع الناس فى اى حاجة بتدايقنا سواء فى نفسنا او فى الدنيا حوالينا
و هو احنا لو ما حاولناش نحسن الدنيا من حوالينا
مين اللى هيحاول؟؟ و اللا نستورد شعب يحسن اوضاع البلد ؟؟"

"ايه يا بت يا ايناس الكلام الكبير ده؟
بصى يا ايناس
صحيح انتى عاملالنا صداع و قالبة دماغنا
بس انا قلت هتخلص منك و ادورلك على اى بوبى يتجوزك و يريحنا منك
بس انا مش مستغنية عنك و اكيييييد مش مستغنية عن اى حد فى البيت ده
فلمى الدور كده و اهمدى
هتدخلى اخرة قبل اما تدخلى دنيا يا موكوسة
يا كده يا هولع فى الكمبيوتر"
قلتلها ما انا ممكن ادخل عالموبايل
قالتلى خلاص
لو انتى مستغنية عن نفسك
لو حصل اى حاجة
هتبرأ منك و لا انتى بنتى ولا اعرفك
و قد اعذر من زرزررررر

يا ريتنى يا ماما ما قلتلك و كنت قعدت جنبك اتفرج عالحاج ميتو

طلقتين تحية بمناسبة الافتتاح

السلام عليكم
ايه يا جماعة ده
ده اكيد زهايمر مبكر
بأة يطلع عندى مدونة و انا ما اعرفش
بقالى كتيييييييير بكتب حاجات حاسة بيها و عاوزاكم تشاركونى فيها و بنشرهالكم عالفيس بوك
و بعدين قلت طب ما نلمهم كلهم و نحطهم فى حتة واحدة
و بعد بحث و تنطيط فى مدونات خلق الله
قلت خلاص نتلم كلنا فى مدونة واحدة "تجمعنا كلنا"
جيت اعمل اكونت
لقيته بيقولى انى عندى اكونت اساسا بس محتاج الباسوورد
قلت اكونت ايه و فين
قلت يا بنتى خليكى و را "بلوجر" لحد باب الدار
قالى اعملى باسوورد جديدة
عملت
و اذ فجأة
"تاتاتاتااااااااااااااااااااااا"
لقينى فى مدونة مكتوبة باسمى "يا حلولى يا حلولى"
و اسمها نفسى
و كمااااااااااااااااااااااااان فيها بوست واحد يتيم
الكلام ده كان من حوالى سنتين
بس من هنا و من هذا المزنق
احب اعلن لكم عن افتتاح مدونة غلبانة اوى اوى
يمكن ما يدخلهاش غيرى
بس هتكون عاملة زى البيت المهجور
انا عاوزاه يكون بيت عيلة
لييييييييييييييييييييييه؟؟؟
عشان يجمعنا كلنا :)))
من الاخر
زورونى كل سنة مررة حرام تنسونى بالمرة
و هنيالك يا فاعل الخير و الثواب
و السلام عليكم و رحمة الله