لا انتى بنتى...و لا اعرفك

"شوفى يا ايناس
انتى بنتى و حبيبتى و "كفاءة" بس لو عملتى كده ...لا انتى بنتى ولا اعرفك
ادينى بقولك اهو
و قد اعذر من زرزر"
................
دى كانت اول ردود افعال الوالدة لما رحتلها شايلالها خبر -تخيلت انه مش هيفرق معاها كتير
خبر افتتاح - ام نقول اعادة افتتاح - لمدونتى الغلبانة
كان اول رد فعل ليها هو سؤال وجيه و حيوى و مهم
"يعنى ايه مدونة؟؟"
قالتها و هى مشغولة فى الفرجة على مسلسل عائلة الحاج متولى للمرة التسعتاشر
كانت تقريبا مش بصالى
سكت كده شوية و بينى و بين نفسى عمالة ادور على تعريف سهل للمدونات بس فى الاخر لقيت نفسى عمالة اتهته بكلام غير مفهوم مصاحب بتشويحات عصبية بايدى "كأنى حاوى هيطلع ارنب من ودانه"
طلعت منى اخيرا كلمة مفهومة
"يا ماما البلوج ده زى صفحة على النت لكى ان تكتبى فيها ما تشائين وممكن بعد كده ناس تقراه و تبدأ تناقشك و تحاورك فى اللى انتى كاتباه
"اممممممم...و انتى هتكتبى ايه بأة؟؟؟"
سألتنى و هى لسه بتتفرج على الحاج متولى بمراتاته بشققه الفخمة - اللهم لا حسد - بعربياته بسلطاته ببابا غنوجه
"هكتب فى اى حاجة و كل حاجة , اى حاجة بتحصل حوالينا و مش بناخد بالنا منها, يمكن نقدر نغير الحاجات اللى مش عاجبانا و يبأة عملنا حاجة عليها القيمة فى الدنيا دى"
طبعا و انا بتكلم فى جدية شديدة و عاقدة حاجبي و بررررررضه بشوح بايدى و لا كأنى جمال عبد الناصر فى خطاب تأميم قناه السويس
و ماما العزيزة و لا هى هنا "بصى يا بت يا ايناس الستاير عاملة ازاى
تلاقيها متكلفة شىء و شويات"
جرررررر
ستاير ايه يا ماما و انا بكلمك فى ايه
بقولك مدونة و سياسة و اقتصاد تقوليلى ستاير
ايه ايه ايه ايه؟؟؟؟؟؟؟؟ سياسة مين يا بت؟؟؟
اوباااااااااا ماما سابت الحاج متولى و فاقتلى
"ايه يا ماما بس؟؟؟"
"سياسة ايه اللى عاوزة تكتبى فيها؟
بقولك اييييييه لمى الدووووور و بلاش جنان
انتى عاوزة تروحى فى داهية؟"
"ايه يا ماما هو انا قلتلك انى هرتكب جريمة؟
انا عاوزة اتكلم مع الناس فى اى حاجة بتدايقنا سواء فى نفسنا او فى الدنيا حوالينا
و هو احنا لو ما حاولناش نحسن الدنيا من حوالينا
مين اللى هيحاول؟؟ و اللا نستورد شعب يحسن اوضاع البلد ؟؟"

"ايه يا بت يا ايناس الكلام الكبير ده؟
بصى يا ايناس
صحيح انتى عاملالنا صداع و قالبة دماغنا
بس انا قلت هتخلص منك و ادورلك على اى بوبى يتجوزك و يريحنا منك
بس انا مش مستغنية عنك و اكيييييد مش مستغنية عن اى حد فى البيت ده
فلمى الدور كده و اهمدى
هتدخلى اخرة قبل اما تدخلى دنيا يا موكوسة
يا كده يا هولع فى الكمبيوتر"
قلتلها ما انا ممكن ادخل عالموبايل
قالتلى خلاص
لو انتى مستغنية عن نفسك
لو حصل اى حاجة
هتبرأ منك و لا انتى بنتى ولا اعرفك
و قد اعذر من زرزررررر

يا ريتنى يا ماما ما قلتلك و كنت قعدت جنبك اتفرج عالحاج ميتو