القرد فى عين امه ........سبحن الله قرد برضه

مساء الخير عليكم جميعا

يمكن العنوان يدى ايحاء اننا بنتكلم عن فصيلة القرود, او يمكن يوحى اننا هنتكلم عن الناس اللى ربنا سبحنه و تعالى لم يرزقهم نعمة الجمال

و بالتالى لا احد يرى فيهم جمالا سوى امهاتهم, اعمالا للحقيقة العلمية اللى مش عارفة مين اللى قالها انه : القرد فى عين الست مامته غزال- حتى و ان ثبت العكس بعد حادث مؤلم حصل معايا شخصيا - هحكيهولكم بعدين - و اكتشفت ان القرد فى عين والدته برضه قرد - عادى يعنى

المهم احنا هنا عشان نتكلم عن شريحة عريضة من بنات مصر اللى ممكن نطلق عليها مجازا"مولان" نسبة الى الشخصية الكرتونية

"مولان "

قصة مولان للى ما يعرفهاش هى انها بنت من قبيلة هندية, ليست ببارعة الجمال

و ليست فى رقة النسيم اللى بيخلى الشعر الحرير عالجبين يهفهف - هفهف- لكنها فتاة متوسطة الجمال

و للاسف الشديد دماغها كبيرة و عقلها واسع

و زى ما بتحب اهتمامات البنات, برضه ليها اهتمامات تانية غير الطبيخ و المكياج و حواديت البنات فكانت بتقول عن نفسها

she is a girl who have a brain & always speaks her mind

معلش اصلى ما عرفتش اجيب الفيلم مدبلج

- يعنى انها بنت عندها مخ و بتتكلم من عقلها

المهم شريحة مولان فى بلدنا الحبيبة تقدر تجد اعراضها على البنات من سن ابتدائى

فتيات مولان فى الفصل هما البنات الهادية ,المتفوقة دراسيا , و اللى هتفضل لغاية اعدادى ما عندهاش اصحاب كتير و اكيد اكيد ما عندهاش اى اصدقاء مع النوع الاخر

تتطور الاعراض فى المرحلة الاعدادية فتجد البنت مولان شخصيتها قوية

ما زالت هادية منزوية عن الشلل المتكونة من تلاميذ و تلميذات الفصل

و ما زال عدد اصدقائها معدودين - ده اذا كانوا ما زالوا موجودين اساسا و ما نقلوش مدرسة تانية او فصل تانى مثلا - و للاسف لسه برضه متفوقة لان ما فيش فى دماغها اى حاجة تانية غير المذاكرة و الدراسة - عالم بائسة يعنى.

هتدخل فتاة مولان مرحلة الثانوية العامة و بتشوف البنات صحابها "مأنتمين و مصاحبين "و بيروحوا و ييجوا الدروس مع اصدقائهم لكن هى ثابته على موقفها

"لا للصحوبية "

فأخلاقها و دينها يمنعونها من هذه و تلك و تفضل تقول لنفسها ان شاء الله انا هكون احسن و ربنا ما بيضيعش صبر عباده ابدا

خلصت الثانوية و دخلت مولان كلية من كليات القمة - متفوقة دراسيا بأة من صغرها - و شافت فى الجامعة ما لا عين رأت و لا اذن سمعت و لا خطر على قلب بشر

شافت ان الشباب ما بيبصوش الا للبنات اللى كانوا "مأنتمين " ايام ثانوى

و شافت ان كل البنات دول اتخطبوا من سنة اولى و عااااااادشى جدشا

و هى برضه فضلت ثابتة على موقفها و على اخلاقها و دينها و تربيتها و هى على نفس الامل ان اكيد ربنا شايلها حاجة احسن بكتييييييييير و انها اكيد هى الصح

بس بعد اما وصلت للسنة النهائية للكلية و ما فيش اى حاجة

!!!!!! ابتدت مولان تشك فى نفسها و تقول يمكن اكون انا وحشة , طب يمكن اكون قفلتها على نفسى زيادة عن اللزوم

!!!!!!!! يمكن اكون جد زيادة عن اللزوم

ابتدت مولان تسأل و تستشير - على رأى الاعلانات- هو انا يا جماعة مش حلوة - لا يا بنتى ازاى ما تقوليش كده

. طب ايه؟؟؟؟؟

و ابتدت تشوف نظرة الناس ليها عاملة ازاى, و تستقصى و تشوف ايه اللى الشباب بيهتموا بيه فى البنات - مش عشان تعمل زيهم بس عشان تكون فاهمة : ليه هى و اصحابها اللى على نفس مبادئها هما اللى مستنيين و البنات " المأنتمين " هما اللى خلعوا؟؟!!

لقيت ان معظم الناس بتقول يا بنتى الشباب بيدور على لشكل فقط و ما بيدورش على اى حاجة تانية

و ناس تانية تقولها : لا الشباب مش بيحبوا البنات العاقلة اوى عشان ما تفرضش سيطرتها عليه او عشان عقلها ما يكونش اكبر منه - يا نهار اثود على كده دول بيعانوا من عقد نقص بأة !!!!!

و بعد البحث و التمحيص وجدت مولان ان فيه بنات كتييييييير زيها, بنات مثقفة و عاقلة - و افنت حياتها فى محراب العلم - الله يحرقه - و ما كانتش بتبص يمين و لا شمال; لان الدراسة عندها و دينها كانوا رقم واحد....... و مع ذلك برضه ما لفتوش نظر حد.

فبدأت تسأل السؤال الوجودى الجبار : طب اييييه؟؟؟؟؟؟

و لما ما شافتش انه فيه اى سبب مقنع قالت اكيد اللى قالوا انى حلوة - و اللى غالبا بيكونوا الاقارب و الاصدقاء, يطبق عليهم مبدأ "القرد فى عين امه غزال"

و ما زالت مولان تبحث عن اجابة

و على من يجد الاجابة الاتصال على 09000

او يبعتلنا ميسد كول

و احنا هنتلقى كل ردودكم