كل رمضان بييجى و بنفاجأ بالعديد من الحملات الاعلانية التى تغرق شاشات الفضائيات
و السنة دى زى كل سنة
الكثييييييير من الحملات الاعلانية لمختلف المنتجات , بس الجديد فى الموضوع هو ان بعض الحملات الاعلانية دى بتعتمد على استفزاز المشاهد و الغلاسة عليه; كأحد وسائل لفت النظر او التعليم معاه
من اوضح هذه الحملات هى حملات الحكومة, اللى مصممة تحسسنا انها ماسكة علينا ذلة
و اللى بتحاول تثبتلنا انها لاوية دراعنا و ما حدش يقدر يعملها حاجة - ما احنا عارفين يا جدعان خلاص يعنى - حتى فى اعلاناتها من اول اعلانات الضرايب; اللى اتطورت دلوقتى و اصبحت تهدد الجميع بانه "هيجيله يوم و يقع فى عينة الفحص الضريبى" و ساعتها هتبيعه اللى و راه و اللى ادامه, و لو ربنا رحمه و مات... فهتدور على الورثة عشان تبيعهم اللى كان ادام ابوهم و وراه
و زاد على اعلانات الضرايب اعلانات تذاكر القطر, اللى المفروض انها تهدف الى دفع ركاب قطارات سكك حديد مصر الى شراء تذاكر القطر بدلا من الشعبطة بين عرباتها او التسطيح على اسقفها
ليه؟؟؟؟
عشان عيب انك تعتدى على حق غيرك, و تركب القطر من غير تذكرة ...مما يؤدى الى تعطيل مسيرة التطوير... و قطار الديمقراطية اللى خارج من اعماق الشعب .......شلولح
, معنى ذلك ان تذكرتك يا مواطن هى اللى مخلية عربيات الدرجة التالتة لا تصلح للاستخدام الادمى
و ان تذكرتك دى هى - و هى بس - اللى تسببت فى حرق قطار الصعيد ,امال انتوا فاكرين ان الملايين المتلتلة اللى بتدخل لهيئة السكك الحديد تكفى تجيب علبة دهان ندهن بيها الجرارات؟؟؟
. قال يعنى الناس غية عندها تتمرمط و تتنطط بين عربيات القطر, و بتحس بانشكاح لما بتسطح على سقف القطر عشان الجو فوق طراوة
و بتحس كأنها احمد السقا لما بتخاطر بحياتها بانها تقع تحت عجلات قطاراتنا المتهالكة
الالذ بأة ان الاعلان فى اخره جاى يقول بكل بجاحة الحقيقة : فكرك الاعلان ده هيعمل حاجة ....ابداااااااا - امال واجع دماغنا ليه من الصبح - لكن الدور و الباقى عالشعب اللى لازم ياخد حقه بدراعه, و لو لقى حد راكب من غير تذكرة لازم يحس بالانتماء شوية و ياخد الراكب العميل ده قلمين
واضح جدا ان منظمى الحملة دول مش مصريين او ما ركبوش قطر درجة تالتة و لا تانية حتى قبل كده لانه لو كان ركب كان هيعرف ان اى مواطن مصرى هيشوف اخوه المواطن التانى مش لاقى تمن التذكرة و متشعبط بين الجرارات مش هيقول غير حاجة واحدة بس : حسبى "الله و نعم الوكيل فى دى بلد"
اعلان تانى برضه متعمد يغلس عالناس, هو اعلان المشروب الغازى "شويبس " الاعلان جاى بكل صراحة يقول :
احنا ما بنعملش اعلانات, و ما بنطبعش بوسترات, و ما بنوزعش تلاجات..... احنا بس قلنا نعمل الاعلان ده لحسن تقولوا ما بنعرفش - شايف ام الغلاسة -
و يكمل الاعلان الرهيب الشنيع و يقول: و روح يا بابا اسأل حد كبير
, يعنى كمان مستهيفنا
خلانى اقول : انا اللى استاهل الضرب انى بتفرج على اعلان زيك
و هى دى نوعية الاعلانات اللى بتتبع سياسة الحكومة فى الغلاسة و بتقول للناس بكل سماجة ...ايوة احنا اعلان و هتشوفه ..ها ليك شوق فى حاجة.
مع بالغ احترامى و تقديرى للاخ الكبير محمد فتحى
Posts
0 رغيكم يهمنا:
Post a Comment