هل البنى ادم "فى مصر" مسير ام مخير؟؟

سؤال محيرنى بقاله فترة وعمال يزن فى دماغى يزن يزن زى الدبور اللى عمال يزن على الدمار الشامل لعشه

سؤال خلى كرامتى و العرق التركى اللى سمعت انه فى عيلتنا - و مع ذلك ما ظهرش غير عند اصغر اخواتى ينقح عليا و اقول ابدا انا بعمل كل حاجة بمزاجى و ما حدش يقدر يفرض عليا حاجة.
هع ههع ههع- ضحكات ساذجة متصلة.
السؤال هو :هلى المواطن المصرى مسير ام مخير ؟؟؟؟؟؟
بعيدا عن الناحية الدينية خالص يا جماعة
طب ما تيجوا نتفرج على حياة مواطن مطحون - اقصد مصرى من البدايات المبكرة يمكن اقدر افهمكم قصدى.
الاسم :المواطن المطحون "ميدو"
محل الاقامة : منزل اسرة متوسطة "يعنى دخلها ما يزيدش على 700 فى الشهر و مقضياها جمعيات و شقلباظات"
الوظيفة : بسم الله ما شاء الله داخل كى جى 1
السن 5 سنوات و احيانا 6 حسب المدرسة

المشهد الاول :

فى منزل الاسرة السعيد و فى حوار هادىء بين الاب و الام
ام ميدو:الواد ميدو لازم يدخل مدرسة خاصة ادينى بقولك اهو, و اللا عاوز الواد كيمو ابن خالته يطلع احسن منه!!
ابو ميدو: وهنجيب مصاريف المدرسة منين ما انتى عارفة ان مصاريفها شوووووك
ام ميدو : ما ليش دعوة هعمل جمعية و اقبضها الاول اهم حاجة الواد كيمو ما يبقاش احسن من ميدو حبيبى
ميدو - و البراء فى عينيه: ماما مث عاوذ الوح المدلثة خالث خالث
ام ميدو : بس يا واد مش كفاية هيتقطم وسطنا فى الجمعية عشان ندخلك احسن مدارس
ميدو فى عقله الباطن طب و انا مالى انا مث هلوح المدلثة دى انا عاوذ اقعد اتفلج على ثبيث تووون عاااااااااااااااااا

المشهد التانى :

اول يوم مدرسة لميدو , الحضانة مليانة على اخرها عيال صغيرة عمالين يعيطوا و هو مكلبش فى ايد مامته من هول المنظر
ام ميدو: يللا بأة يا ميدو ادخل جوة مع الميس
ميدو: لا لا انا ما تمثيث و تثيبينى لوحدى
ام ميدو : ما انت يا حبيبى مش لوحدك ولا حاجة كل العيال موجودة اهو و بعدين ما تخافش الميس هتفضل معاك
ينظر ميدو للكائن المسمى "ميس" و هى تقترب و تستعد للانقضاض عليه و يتطاير من عينيها الشرر
عاااااااااااااااااااااااااااااااااااااااااااا مش رايح مش راااااااايح

المشهد الثالث :

كبر ميدوو وصل للابتدائية و بأة مستأنس خااااااالص و بيروح المدرسة عادى بلا ادنى اعتراض
ام ميدو: شد حيلك يا ميدو عاوزينك تجيب درجات عالية فى الابتدائية
ميدو : ماما انا عاوز اسألك سؤال, هو انتوا ليه عاوزنى اجيب درجات عاليه؟ هعمل بيها ايه يعنى
شهقت ام ميدو شهقة من المعاميق و ضربت على صدرها و قالت: يعنى ايه ليه لازم طبعا تتفوق و تجيب درجات عالية دى شهادة يابنى مش لعبة
ميدو : ايوة برضه ليييييييه؟
ام ميدو : هو كده عشان تبأة كويس فى البلد دى لازم تذاكر وتنجح و تجيب درجات عاليه و بعدين بقولك ايه انت عاوز الواد كيمو يبأة احسن منك قوم يا واد شوف مذاكرتك لحسن اصحيلك ابوك
طأطأ ميدو رأسه فى استسلام و رجع لمذاكرته و انتهى الامر


المشهد الرابع :

ميدو وصل للثانوية العامة و بيحاول يقرر يدخل علمى و اللا ادبى
ام ميدو: علمى طبعا,انت لازم تكون دكتور واللا مهندس لكن هتدخل ادبى تعمل ايه بطل خيابة يا واد
ابو ميدو فى اول ظهور له منذ فترة: بص يا ميدو يا حبيبى شوف انت بتحب ايه و ادخل اقرب مجال ليه
ميدو: يا بابا ما انت عارف انا طول عمرى بحب الكتابة و نفسى اطلع كاتب او صحفى ده حلم حياتى
ام ميدو: يا لهوى صحفى ايه و كتابة مين؟؟؟ انت عاوز تطلع شحات يا واد , هى كلمة ادخل علمى و اطلع دكتور و اللا مهندس و بعدها ابأة اكتب اللى انت عاوزه انشالله تكتب كتابك عالبت اخت كيمو, لكن ما فيش حاجة اسمها ادبى.......و اللا عاوز الواد كيمو يبأة احسن منك
ابو ميدو باتسامة منكسرة: خلاص يا ميدو ماما عندها حق .....معلش عشان ماما ما تزعلش منك
ميدو و هو برضه مطأطىء الرأس: خلاص يا بابا خلاص يا ماما اللى انتوا تشوفوه


المشهد الخامس:

نتايج الثانوية العامة طلعت و التليفزيون شغال و كل 10 دقايق بيذيع اغنية" و حياة قلبى و افراحه"
غالبا المسئولين فى التليفزيون بياخدوا اليوم ده اجازة و بيشغلوا شريط الاغنية و ياخدوا نص يوم و يروحوا
ام ميدو: الف مبروك يا ميدو جبت مجموع يدخلك هندسة زى ما طول عمرى بحلم....اخيرا همشى جنبك كده فى الشارع و اقول ابنى الباشمهندس ميدو اهو
ميدو بيفكر فى سره على الله بس ما يقولوش العبيط اهو اهو
ميدو : الحمد لله يا ماما بس انا عاوز اقولك بس انى بجد مش عاوز ادخل هندسة و لا نيلة انا ما بحبهاااااااااش انا عاوز ادخل اعلام قسم صحافة و الحمد لله انا جايب مجموع يدخلنى اعلام
ام ميدو تانى يا ميدو تانى يا بنى الكلام ده ما بيأكلش عيش حاف لكن مهندس هيبأة ليك شنة و رنة
ميدو : يا ماما ما هو المهندسين هما كمان مش لاقيين ياكلوا عيش حاف و متمرمطين هما كمان
ام ميدو: مش مهم المهم انك هتكون مهندس هو انت طايل يا كدا يا هصحيلك بابا
ميدو برضه مطأطىء الرأس بس خلاص دقنه قربت تلزق فى صدره
حاضر يا ماما اللى تشوفيه

المشهد السادس و الاخير:

ميدو بعد التخرج من كليه هندسة بسنة كاملة , قاعد فى البيت من غير شغل و لا يحزنون
ميدو :عاجبكم كده ادينى دخلت هندسة زى ما انتوا عاوزين
و ذاكرت و نجحت زى ما انتوا عاوزين
و ما رضيتش ادخل اعلام عشان ما تزعلوش
و ادى النتيجة قاعد جنبكم و مش لاقى شغل فى الهندسة و لا فى غيره
مش كنت دخلت اعلام على الاقل كنت هعمل حاجة بحبها؟
ام ميدو: خلاص يا ميدو كل شىء قسمة و نصيب و ابوك بيكلم عمك ابو كيمو عشان يشوفلك اى شغلانة معاه فى مكتب المحاسبة بتاعه
ميدو: طب و انا هعمل ايه فى مكتب المحاسبة و انا خريج هندسة
ام ميدو: اى حاجة يابنى هو انت طايل بدال قعدتك دى
ميدو : لا خلااااااااااااااص انا كده شبعت و اتهريت
انا هدور على الشغل بنفسى و اعمل اللى انا عاوزه ان شالله اشتغل صبى قهوجى بس كده كفاية خلاص فضلت اسمع الكلام لحد ما ودانى دلدلت
و من هنا و رايح مش هعمل غير اللى انا عاوزه فى الوقت اللى انا عاوزه

ام ميدو بتبص لابو ميدو باستغراب و بصوا فى الارض و هما كمان مطأطأين الرأس

عرفتوا بأة سؤالى معناه ايه ؟؟؟؟؟
هل المواطن او بمعنى ادق الشاب المصرى مسير ام مخيييييير؟